Kaso ti Pasahero nga Al-alia

Nakaas-asdaaw met no umad-adda ti panagayatmo iti ania man, maawatmonto. Ngem, no dadduma no dika agaluad, saan met gayam nga umisu ti inar-arigmo.

Aplaya iti West Seattle

Adda ababa a rangtay iti West Seattle nga agrukrukod iti nailet, ngem adalem, a baw-ang asideg iti Admiral Theater. Ti sarsarita kano makakitkita dagiti gamgamgamit iti itsura ti maysa daydi nagpakamatay a limmagto sada nagdisso idiay kalsada iti baba. Agmatmata kano pay 'toy nakakaasi a kararua kadagiti tattao idiay aplaya ti nakapatayanna. Ti kaabayna met aso a simmurot kenni amona aginggana't nagkaysa a biag.

Arig dagiti babbaro ken babbalasang, kabisado da Mike, ni kabagianna ken dua a gayyemda a babbai daytoy nga istoria ket nagbirbirokda iti nalaka a palinglingayanda kadaydi a rabii. Idi alas tres ti parbangon, dida met bukbukod a simmangpet. Kakuyogda ket dadduma a tattao a nakangeg kadaydiay nga istoria sa nakaparada ti luganda iti igid ti umis-isu a kalsada.

Panagsitar idiay baw-ang. Makitkita dagiti poste ti rangtay
iti tengnga ken kannawan a likod kadaytoy a ladawan.

Idinto nga saanda met da Mike ken dagiti pasaherona a nakakita iti al-alia kalpasanda nagbayag a naguray, nagrugida a laisen diay ispiritu bayatda kinarkarit nga agpadlaw sada rinabrabak. Idi pinanawanda Mike diay nagparadaanda, nagrugin dagiti babbai idiay likod nga agririaw iti buteng gapu ta ti ballaetda a dua ket naap-apnutan a kas adda ti nagtugtugaw - Kinumbidadansa la ketdin diay ispiritu iti uneg ti lugan!

No diay lalaki nga adda asona wenno saan, awan uray maysa kanitoda a makakeddeng. Impaigid ni Mike diay lugan a dagos idiay kalsada. Iti kaparparadana, awan a pulos ti makapagsardeng iti panagpanawda nga upat. Kalpasanda a nagtanang sada intured ti riknada a makasubli idiay lugan, sinipasipda diay likod a tugaw, diay tengngana, ket nagnadnaden. Uray man, nagbayagda pay bassit sakbay nga immunegda iti lugan sada nagawid.

[Inar-aramat ti parbo a nagan tapno masalakniban ti kinapaknian dagiti tattao. Inaramat it istoria babaen palubos.]

Copyright © 2012 ni Joseph S. Maza. Amin a karbengan ket naikutan.